Nieuws

Bouquinales en streeketaelen naer Haezebroek

: 13 maart 2014

Zundag, den 16sten van maertemaend je gaet moeten kommen naer Haezebrouck in den Augustynklooster ten 10en in de Bouquinales Haezebroek om den rond taefel te kunnen hooren tusschen Henriette Walter taelekunsteneege en de members van de ANVT. Me gaen zeeker van de streeketaelen klappen !

Steivooizinge : wuk peinst julder kandidaet van de Vlaemsche streeketaele ?

: 10 maart 2014

Je weunt in Fransch-Vlaenderen ?

'T is hooge tyd van dat nhem te vraegen.

De ANVT propooseert van dien brief te zenden an den(de) kandidaet(en) van je prochie om te weeten wuk dat hen(ze) wult(wullen) doen om 't leeren van 't Vlaemsch in de schoole en om de tweëtaelige panneels en wegwyzers in je stei.

Je moet de antoorde(n) geeven, me gaen ze schryven op 't nethuuseke van de ANVT

Members van de FLAREP zyn naer de Ministeerje van 't Schoole en van de Hoogeschoolen ewist

: 20 februari 2014

Den 12sten van kortemaend, een stik of 4 members van de Federaesje om de Streeketaelen in 't Puublyk Schoole is in de Ministeerje van 't Schoole en oek van de Hoogeschoolen egaen.

Achter de vooizinge van de propozysje van de Konstituutionneele wet om de Keure van de streeketaelen te weereteeken en achter de wet van de weerefondaesje van 't schoole, deeze vergaeringe wos operecht om te klappen van alle dan me wullen krygen om nuuze taelen en eerst van de achte poointen dat me hen evraegd binste de jaervergaeringe van de FLAREP en zeekers een echte plekke om 't Vlaemsch in 't tweetaelig leeren.

Je gaet hier de verhalse van deeze vergaeringen kunnen leezen al hier klykken.

Een nieuwen groep van Vlaemsche konversaesjen operecht naer Koudekerke

: 28 februari 2014

SOS Blootland (associaesje-member van de ANVT) en de "Plaisirs de la Vie", hen een nieuwen groep van Vlaemsche konversaesjen operecht naer Koudekerke in de Simonssaele - Jean Vilar Center, den 28sten van kortemaend van ten 14nen toet den 16nen mee de helpe van Bernard Dannoot. Den program : Vlaemsch leezen, gedichten zeggen en liedjes zingen al een potje kaffee drinken. Mee een stik of veertig meidoenders, 't was een heelen suukses. Ze kommen weere den 14sten van maertemaend in de zelfde saele en op de zelfde eure.

Nog een keer een nieuw hoeksche waer dat me gaen de Vlaemsche taele tegaere kunnen klappen en doen verbeeteren. Felicitaesjen an de vrywilligen !

Vooizinge van de propoozysje van wet om de weereteekeninge van de Keure om de streeketaelen

: 30 januari 2014

Dysendag, 70 % van de depuuteis hen evooisd om de Konstituutionneelewet om de Europeansche Keure van de streeketaelen te weereteeken. T is een recht suukses. De liefhebbers van de streeketaelen hen nog nie ewonnen maer ze zyn op den goeden weg !

Den tekst van de propoozysje van wet is nuuw in den Senat ineschreeven om daer oek evooisd te zyn.

Me weeten ael dat zonder de weereteekeninge van de Keure, nuuze streeketaelen gaen een lytje op een keer verdwynen.

Den tekst dien evooisd het van de depuuteis en is nie den besten van de weereld maer t is beeter mee die wet of geen wet om nuuze taelen.

En nuuw, hoe hen de depuuteis van nuuze streeke evooisd ?

In t Noorden : t zyn 62 % van de depuuteis die om de wet evooisd hen en me moeten de 2 Vlaemsche depuuteis dien in nuuzen Raed zetten bedanken om wel evooisd te hen : Jean-Pierre Allossery en Jean-Pierre Decool (in nuuze streeke, hen was aleëne in den UMP van evooisd te hen om de wet).

In t Pas de Calais : t zyn daer 92 % die om de wet evooisd hen !

T maekt 73 % om dheële streeke. T zyn goede nieuws om t Vlaemsch en om t Picaerdsch.

Gy die dat leest, je moet an je depuutei schryven om nhem te bedanken at hy om de wet evooisd het.

Je gaet hier de naemen vinden en wuk ze hen evooisd .