Nieuws

Een gaeve doen om de Vlamsche kuulteure voor den 31sten december ...

: 08 december 2017

en een afslag van je kontribuusjen krygen van 66 ten honderd in 't jaere 2018, 't is meugelik !

De Akademie voor Nuuze Vlaemsche Taele is vansichten t jaer 2013 van de Direction Générale des Finances Publiques erkent om fiskaele vertoogbrieftjes uut te geeven in t verwisselen van de gaeven en van de enterpryze helpe (Art. 200 en 238 bis van de CGI). T is meugelik van gaeven te doen en fiskaele afslaggen te krygen ael de Vlamsche kuulteure helpen en ooverael ze streeketaele.

T geld diet egeeven gaet zyn gaet dienen om t leeren van de schoolejoungens en de groote menschen en oek om den Geschryften Center wel te doen draeien. Je gaet oek de naemen van de menschen dien gaen geeven kunnen leezen om t nethuuseke van de ANVT, deël « Ze doen mei ». Om elke gaeve dat me gaen krygen vóór t ende van t jaer, je gaet een fiskael vertoogbrieftje krygen om je gaeven van je kontribuusjen van t naest jaer te kunnen aftrekken. En t is djuust om de menschen dien nuldere kontribuusjen in Frankryke betaelen.

Om meer te weeten, klykt hier. Om een gaeve te doen mit internet, klykt hier.

Azoo, varre of nie varre van je streeke, je gaet kunnen helpen om de promoosje van je streeketaele ael een deël van je kontribuusjen en oek een eegen helpe geeven.

Netwoordenboek : 2400 woorden derby

: 22 september 2017

Mee de nieuwe versje van september 2017 je gaet 2386 woorden meer vinden.
'T zyn nuu 11395 woorden daerin : 5658 Vlamsche woorden (+1474) dien verfranscht zyn en 5737 Fransche woorden (+912) dien vervlamscht zyn.
En 't zyn oek 2251 eksplikaesjen (+567), om beeter te verstaen wulk de woorden wullen zeggen, en 159 spreekwoorden of spreekfatsoenen (+14).
Je gaet oek de fonetyke kunnen vinden van alle de nieuwe woorden dien eschreeven zyn.
Klykt maer !

'T West-Vlamsch op den luudigen Atlas van de streeketaelen van Frankryk

: 09 juni 2017

In Oktoober, me hadden mee den CNRS evrocht om een faebel te vervlamschen en te opneemen in den kaeder van 't oprechten van een luudigen Atlas van de streeketaelen van Frankryk.
En 't is djuust binst de Weeke van de Vlamsche Taele dat 't werk gereëd is en dat me blyde zyn van den Atlas te toogen.
Den CNRS, lik de UNESCO en de Ministeerje van de Kuulteure, zegt azoo dat 't West-Vlamsch de streeketaele van Fransch-Vlaenderen is. En is dat nie schoone ?
Om op den luudigen Atlas te gaen, klykt om de kaerte.

De Vlamsche lessen in 't schoole en mee d'associaesjen gaen weerebegunnen

: 16 september 2017

Mee 't nieuw schoolejaer de Vlamsche lessen gaen voorwaert. Je gaet nog een keer veele lessen kunnen vingen.
Lessen mee de associaesjen om de groote menschen : ze gaen egeeven zyn in 23 prochien, van Duunkerke toet Belle mee 28 lessen elk weeke van den maendag toet den zaeterdag achternoene. T zyn oek nuu 12 konversaesjen waer de menschen gaen Vlamsch kunnen klappen elk maend.
In t krutschoole : T Vlamsch is eleerd in 4 schoolen van de arrondissement : 3 puublyke schoolen (van den CE2 toet den CM2) en een lyber schoole (van de MS toet den CM2) waer ze kunnen vansichten t jaer 2007 de streeketaele leeren. Veele inisiaesjen gaen oek egeeven zyn in de krutschoolen van de arrondissement.

In de koleegen : Dit jaer, een lyber koleege gaet Vlamsche lessen geeven an de jonge menschen van de 6de en oek an de 5de.

Om ael te weeten je moet klyken op : vlamsche lessen 2017-2018

Depuuteis vooizingen en West-Vlamsch : de antoorden van de kandidaeten

: 09 juni 2017

Lyk de geweunte binst de vooizingen, me hen an de kandidaeten van de drie deëlen van de arrondissement van Duunkerke eschreeven om te weeten wuk ze gaen voor nuuze Vlamsche taele doen et ze evooisd zyn.
Me hen vier vraegen estelt en 11 kandidaeten hen antoord. Azoo, al klyken op 't zantje voor te gaen vooizen, je gaet kunnen leezen wien het beloofd van nuuze streeketaele te helpen en hoe ze gaen dat doen.