Nieuws

Manifestaesje om de streeketaelen Rysel - 31/03/2012

: 30 maart 2012

Mevrouwe de Rectrice van d'Akademie van Rysel en Meneer den Minister van 't Schoole en doen nieten om nuuze streeketaele. Z'hen nog minder edaen of passeerde jaer !

D'associaesjen van d'Akademie voor Nuuze Vlaemsche Taele en d'Ingevooisde Menschen dien de petysje "Ja om het vlaemsch" (www.anvt.org) eteeken hen, hen beschikt in den kaeder van den nationaelen dag om de streeketaelen in 't schoole,

van een manifestaesje t'oprichten,

zaeterdag den 31sten van maertemaend naer Rysel

om dat 't vlaemsch en 't patoosch eleerd kun zyn in 't schoole

en om een wet te krygen om nuuze streeketaelen.

Komt maer mee vriend, kinders en maets !

Om dat de menschen nie slechte gedachten en hen, m' en wullen geen vlaeken zien, maer djuust plakkaerds mee daerop eschreeven « Le droit à lenseignement du flamand pour nos enfants », « Het Vlaemsch voor nuuze joungens in t Schoole » « Une loi pour nos langues régionales » « Een wet om nuuze streeketaelen » en oek doedelzakken, trommels en ael. D'ingevooisde menschen moeten oek nulder driekoleurde echarpen andoen.

De manifestaesjen gaet wandelen van den Rectoraet toet de Prefectuure van ten 10en toet ten 11en en half.

D'andere manifestaesjen op www.languesrégionales.org

2 nieuwe tweetaelige boeken te koopen

: 20 december 2011

D'akademie voor Nuuze Vlaemsche Taele het twee nieuwe tweetaelige boeken edruukt mee d'helpe van 2 members van d'ANVT :

Schryven en klappen - Pour apprendre le flamand : 'T is een boek om de vlaemsche taele te leeren. Hen is eschreeven en de schilderien zyn emakt van Frédéric Devos, schoolekoster in 't Puublyk schoole. De 32ste lessen klappen van 't daegeliksche leeven, de tradysjen en de vlaemsche kulteure.

Stylen en menschen van Vlaenderen - Métiers et gens de Flandre / Op en langst de zee - Sur et au bord de la mer : van een gedacht van d'assocyaesje Het Reuzekoor en ze president Marie-Christine Lambrecht. Je gaet de kennisse maeken mit de kleëne geschilderde kaboutertjes dien emakt ewist hen van den artist en Duunkerkenaer Pierre Herlez. De styf schoone portretten zyn in paegen ezetten van Frédéric Rau. Mit die terracotta bildjes dat Pierre Herlez zo schoone emakt het, je gaet d'oude werkstylen van oovertyd, deëlinge van nuuze Westhoeksche Vlaenderen, kunnen weerezien en weereleeven.

Al klykken hier op de bildjes, je gaet ael weeten op die boeken en je gaet ze kunnen koopen. En is 't dat nie een schoon kadootje te geeven !

Landvergaeringe van de Streeketaelen in 't puublyk Schoole in Vlaenderen - 22, 23, 24sten oktoober

: 18 oktober 2011

De FLAREP - Federaesje om de Streeketaelen in 't Puublyk Schoole - het opericht ewist naer Bayonne (Baskland) in november 1987. Ze vergaerd de grootste associaesjen of federaesjen van ouders of van kosters dien tegaere werken om de streeketaelen in 't puublyk schoole. Ze richt een landvergaeringe op, een keer t' jaers, om te bepeinzen en oek om te vraegen wynne dat zyn member-associaesjen wullen krygen. Ze klappen van den officieelen kaeder en van de bewillighyd van d'autoriteiten om de taelen van Frankryk te doen leeren.
Diet jaer, 't is in Vlaenderen dat de 25ste landvergaeringe van deeze federaesje gaet opericht zyn van d'Akademie voor Nuuze Vlaemsche Taele (die member is) den 22sten, 23sten en 24sten van oktoober in tefrende steien van nuuze streeke : Duunkerke, Bergen, Rysel en oek in West-Vlaenderen : naer de Panne.

In 't herte van deeze 25ste vergaeringe : d'inschryvinge van 't west-vlaemsch op de lyste van de streeketaelen die kun eleerd zyn in 't schoole, maer oek importente eegenkomsten mit ingevooisde menschen van tefrende streeke van Frankryk, mit d'officieele organisaesjen om streeketaelen, mee schoolekosters en ouders van 't heel land. Alleman is welekommen en ooverael d'ingevooisde menschen, de direkteurs van de schoolen, de kosters, d'ouders en d'associaesjen die om de streeketaelen werken.

Je gaet den heelen program vinden al klyken op 't plakkaerdje hier. ====>

Vlaemschen aevend in de Taelen herberg van Duunkerke

: 14 november 2011

Den eersten aevend van 't schoolejaer 2011-2012 van de Taelen herberg, is een Vlaemschen aevend. 'T gaet oensdag gebeuren, den 23sten van november 2011 vansichten 6 en half in den Kof'ty, 3 digue des Alliés, 59140 Dunkerque.
Je gaet de schoonighyd van de vlaemsche taele kun ontdekken mee dit program :
- vertoog van de streeketaele,
- vlaemsche liedjes,
- vlaemsche specialiteiten smaeken.
D'heële bende van de Taelen herberg beit op je !

7de Taele en Muuzyke Feestdaegen - 14, 15 en 16sten van oktoober 2011 - Haezebroek

: 26 september 2011

De 7de Feestdaegen van d'Akademie voor Nuuze Vlaemsche Taele gaen gebeuren in de schoonste gebouwen van Haezebroek : den Augustynklooster, de Sinte-Looikerke en 't Steihuus, mee d'helpe van 't Stei van Haezebroek.
Den program is : vlaemschlessen om de schoolejoungens, konferensje op 't begun van 't graefschap van Vlaenderen, barokke muuzykespil, vergaeringe van rhetorykers, volksbaele, muuzykespil van oovertyd en van nuuw en kraemtjes van kuulteure associaesjen van Vlaenderen. Je gaet nog een keer de vlaemsche ziele kunnen voelen binste d'heële weeke ende.
Om den program te leezen, je moet klyken op den plakkaerd.