Om ‘t nieuw schoolejaer, de vlaemsche lessen gaen voorwaert. In ‘t begun van d’ANVT in ‘t jaer 2004, ze waeren mee 12. Om ‘t schoolejaer 2009-2010, ze gaen nuuw 30 zyn in d’arroundyssement van Duunkerke (toet Armentiers). ‘T zyn 21 vlaemsche lessen die in 15 prochien opericht zyn, 6 vlaemsche konversaesjen en 12 vlaemsche lessen dien op schoole egeeven zyn (4 CE2, 4 CM1 et 4 CM2 in 4 schoolen : 3 puublykke schoolen en 1 lyber schoole). Uut ‘t schoole, de lessen zyn egeeven mee d’helpe van assocyaesjen of gemeenten en d’ANVT doet de Vlaemsche lessen verbeeteren.

Om de vuufde keer, d’ANVT het ekoozen van ze jaerlikke feestdaegen naer Bollezeele t’ oprichten op het land van d’Yzer Hoek om zyn 20sten verjaerdag. ‘N program van deeze jaer gaet ‘n dien van d’Akademie voor Nuuze Vlaemsche Taele zyn : de joungens van de schoolen gaen bezien van ‘t vlaemsch te klappen, vergaeringe van rhetorykers, volksbaele, orgelspil van vlaemsche muuzyke (stikjes van ‘n 16den eeuw toet ‘n 20sten – RAER !!!) vlaemsche muuzykespils van oovertyd en van nuuw, expozysjen. ‘T gaet oek ‘n program van d’associaesje Yzer Hoek zyn : kermisse 1900, komyke klaps, vlaemschen maeltyd, oude sports, hoogemisse mit een vlaemschen sermoen.Voor de Vlaemingen van Frankryke en van de Belgyken en oek voor de menschen van elders, voor de dien die vlaemsch klappen of nie, ‘t gaet een goe weeke-ende zyn mee de vlaemsche ziele.

Om 't vuufde jaer, d'Akademie voor Nuuze Vlaemsche Taele het nog een keer mit de Mynysterie voor de Kuulture edaen. Om de 14de Weeke van de Fransche Taele en van de Taelen van Frankryk, de leerlingen van de vlaemsche lessen hen teksten en gedichten eschreeven mee de vlaemsche streeketaele maer oek in 't fransch. Ze gaen nulder geschryften kunnen leezen beinste de Rhetorykke avend naer Wormhout  vrydag 'n 12sten van juuni op 19 eure in de Mediatheque van Wormhout. Gy zyt welekomen om de vlaemsche taele t' hooren an jun herte klappen !
Je gaet hier 'n program vinden.