De kolokke voor de streeketaelen in 't Puublyk schoole het dit jaer nae Montpellier den 22sten, 23sten en 24sten van Oktoober gebeurt .

Achter de verzeekere klaps van de officieële menschen, me hen kunnen hooren wulk de menschen daervan peinzen in 't dageliksch leeven. Veele menschen die mei-edaen hen. 'T was een kolokke van kaliteit dat de FELCO, den CREO Lengadoc en OCBI opericht hen.
Binste den 2den dag van de kolokke me hen kunnen hooren dat de Oksytaensje taele een officieele taele is in de Kataloonje oover de schreeve... maer in Frankryk nie !

Den derden dag me zyn in den CIRDOC egaen, styf schoon alaem voor de Oksytaensje taele en oek de Oksytaensje kuulteure mee 150.000 boeken, CD, plakkers en geschriften. Een eksempel te volgen en een helpe voor kosters en leeraers, voor zoekers en leerlingen.
Om ael te weeten op den kolokke je moet hier klyken

Mee de Keure "Ja om 't Vlamsch" de stei van Belle had beschikt van de naeme van de stei in Vlamsch te schryven by 't Fransch op de paneels die op 't ingaen van de stei staen. 'T is nuu edaen !

Veele volk en veele suukses voor de inauguuraesje mee 2 depuuteis (JP Allossery en JP Decool), de onderpresidente voor de kuulteure van den Departement (B. Descamps-Plovier), een konselheer van den Departement (JM Gosset), een konselvrouwe van de Streeke (B. Crepel), de burgemeësters van Niepkerke (R. Lemaire) en van Sint-Janskappel (C. Storet) en oek den burgemeëster van Heuvelland, by de Belgyken, (M. Lewyllie). Veele Bellenaers en leerlingen van de Vlamsche lessen van Claude Belpalme. Me zyn preus van Belle en van zyn burgemeÎster Marc Deneuche die preus zyn van de Vlamsche Taele !

Nuuze Akademie het mei-edaen mee den CNRS om nuus Vlamsch in den Atlas van de streeketaelen van Frankryk te opneemen.
Me hen den zoeker en taelekunstenaer Philippe Boula de Mareuïll ontvangd om een faebel (de noordsche wind en de zunne) te doen zeggen van menschen voor wien 't Vlamsch de moedertaele is. Dat werk is voor de Ministeerje van de Kuulteure edaen.
Me hen binste 3 euren lang evrocht al defrente teksten leezen en al klappen van defrente situaesjen. Schoon werk voor de "moedertaele klappers".