Mee 't nieuw schoolejaer de Vlamsche lessen gaen voorwaert. Je gaet nog een keer veele lessen kunnen vinden.
Lessen mee de associaesjen om de groote menschen : ze gaen egeeven zyn in 17 prochjen, van Duunkerke toet Niepkerke mee 28 lessen elk weeke van den maendag toet den zaeterdag achternoene. 'T zyn oek 9 konversaesjen waer de menschen gaen Vlamsch kunnen klappen.
In 't krutschoole : 'T Vlamsch is eleerd in 4 schoolen van de arrondissement : 3 puublyke schoolen (van den CE2 toet den CM2) en een lyber schoole (van de MS toet den CM2) waer ze kunnen vansichten 't jaer 2007 de streeketaele leeren. Veele inisiaesjen gaen oek egeeven zyn in de krutschoolen van de arrondissement.
In de koleegen : Dit jaer, een lyber koleege gaet Vlamsche lessen geeven an de jonge menschen van de 6de en oek an de 5de.

Zundag den 26sten van garsmaend, me hen de 10de keure « Ja om ’t Vlamsch » handteekt na Westkappel.

Westkappel is een prochie mit histoorje en bouwkunste. Ze is een van de laetste prochie van Fransch-Vlaenderen mit een schoon oud kasteel : ’t kasteel van de Briarde. De patrimoonje is daer ooveral en nuuze streeketaele is een deël van de Vlamsche patrimoonje. 'T is dervooren dat Westkappel en zen burgemeëster André Figoureux hen beschikt van de keure « Ja om ’t Vlamsch" te handteëken. Ze hen 4 daeden van de lyste van de keure ekoozen om te begunnen en me gaen ze helpen om ze te kunnen doen. En 't is al begunt deurdat 4 tweëtaelige straetepaneels zyn gereëd om emaekt te zyn.

Vrydag, den 24sten van garsmaend, me waeren na Laffernhoek voor d’inauguuraesje van de audiobezoekleëders in ’t Vlamsch van den Duunenfoort. Alle de teksten hen vervlamscht ewist van den voorzitter van de associaesje van de Maets van den Duunenfoort Jean Caenen, oud koster van Vlamsch na Warhem en de audio bezoekleëders hen emaekt ewist van ’t stei van Laffernhoek.

Achter een woord van Edith David, onder-maire van Laffernhoek voor de kuulteure en de patrimoonje, en van Eric Debril, direkteur van de kuulteure, de tourisme en de patrimoonje, me hen een toertje edaen in den foort al de vlamsche teksten hooren. Ze zyn styf te bedanken om dat te beschikt hen. Den Duunenfoort is nuu den tweëden muuzee mee audiobezoekleëders in de streeketaele mee ’T Huus van den Slag na Peene.