Nieuws

Oopen deure ... op de vlaemsche taele

: 16 september 2010

3 jaeren achter 't begun, den Vlaemsche Boeken en Geschryften Center van d'Akademie voor Nuuze Vlaemsche Taele gruuit.

Hen is nuuw in een nieuwe plekke van den Kulteure Center van Steenvoorde, langs de Carnotstraete mee d'helpe van de stei van Steenvoorde. Hen is oopen 3 daegen te weeke : den maendag, den dysendag, en den woensdag, van ten 9en toet ten noene en van ten 14en toet ten 17en en oek den eersten zaeterdag van elk maend van ten 9en toet ten noene.

Je gaet daer veele geschryften op de vlaemsche taele vinden ( oordenboeken, boeken op de taele, bandopnaemen, geschryften op de plaetsennaemen, boeken van vlaemsche lessen, Cds van vlaemsche muuzyke,...). Je gaet oek kunnen helpe vraegen aen de menschen dien daer werken om een tweetaeligen plakkaert of geschryft doen om je prochie, jen associaesje of je winckel.

Komt maer om dat nieuw brokke alaem van de vlaemsche taele te zien.
Oopen Deure, zaeterdag den 25sten van september van ten 9en toet ten 17en
44 Carnotstraete, Steenvoorde

Vlaemsche lessen en Konversaesjen begunnen in darroundyssement van Duunkerke

: 01 september 2010

Om t nieuw schoolejaer, de vlaemsche lessen gaen voorwaert. Deeze keer, m'hen 25% lessen meer mee Duunkerke, Steenvoorde, Belle (2) en Nieppe. In darroundyssement van Duunkerke, je gaet nuuw 25 vlaemsche lessen en 6 vlaemsche konversaesjen vinden en 12 vlaemsche lessen dien op schoole egeeven zyn (4 CE2, 4 CM1 et 4 CM2 in 4 schoolen : 3 puublyke schoolen en 1 lyber schoole). Buuten t schoole, de lessen zyn egeeven mee dhelpe van associaesjen of gemeenten en dANVT doet de Vlaemsche lessen verbeeteren.

JAERVERGAERINGE : 'n 22sten van mei 2010 in Wormhout

: 12 mei 2010

De Jaervergaeringe van d'Akademie voor Nuuze Vlaemsche Taele gaet gebeuren 'n 22sten van mei van ten 9:30 toet ten noene in 't Steihuus van Wormhout.

Om meer te weeten op 'n program, je kut klykken op 't zantje.

Vlaemschen Rhetorykers avend naer Quaedyper

: 27 mei 2010

Om 't zesde jaer, d'Akademie voor Nuuze Vlaemsche Taele het nog een keer mit de Mynysterie voor de Kuulture edaen. Om de 15de Weeke van de Fransche Taele en van de Taelen van Frankryk, de leerlingen van de vlaemsche lessen hen teksten en gedichten eschreeven mee de vlaemsche streeketaele maer oek in 't fransch. Ze gaen nulder geschryften kunnen leezen beinste de Rhetorykers avend naer Quaedyper zaeterdag 'n 5den van juuni op 17:30 in de 't Hofstee van 'T Zwaert Peerd van Quaedyper. Gy zyt welekomen om de vlaemsche taele t' hooren an jun herte klappen !
Klykt maer op 't zantje.

Feesten van de Taelen van Rysel en Duunkerke

: 17 maart 2010

Ryssel : D'ANVT doet mee de Feeste van de Taelen 'n 19sten et 20sten van maertemaend van ten 09en toet ten 19en - "CCI Grand Lille" - Theaterplaetse. De schoolejongens gaen 't vlaemsch begunnen te leeren 'n 19sten van ten 9en toet ten 10en en van ten 10en toet ten 11en
Duunkerke : D'ANVT doet mee de Feeste van de Taelen 'n 27sten van maertemaend 9e30 - 12e30 en 14e - 18e - Halle van de "Communauté Urbaine". Je gaet 't vlaemsch begunnen te leeren van ten 15en toet ten 16en en een konferensje hooren van ten 16en toet ten 17en oover "De streeketaelen in Frankryk - Hoe is 't mee 't vlaemsch ?" mee Christian Pierre Ghillebaert.