Maendag, voor den 3den en laetsten dag van de kollokke, me waeren in de halve ronde saele van ‘t Huus van de Streeke Top van Frankryk.

François Decoster, ondervoorzitter van de Streeke voor de Kuulteure, de Streeketaelen en de Internasionaele zaeken wos mei om nuus te ontvangen en om te klappen van de Puublyke Office van ‘t West-Vlamsch. Me hen oek een video van den voorzitter van de Streeke, Xavier Bertrand, kun hooren.

Me hen 2 rondtaefels houden :1) ‘T alaem voor een taelepolityke : akkoorden tusschen den Staet en de Streeken, en de Puublyke Officen, 2) ‘T alaem voor de promoosje van de streeketaelen mee de ministeerie van de Kuulteure en mee de kollektiviteiten.

Voor de eërste, ‘t wos interessant van te hooren klappen van de 2 OPLB (Bretonsche en Baske) en van de OPLC (Katalansche) en ‘t gonne dan ze edaen hen voor nhulder taele.

Voor de tweëde, Vincent Lorenzini van de ministeerie van de Kuulteure (DGLFLF) wos oek mee nuus om te zeggen ‘t gonne dan ze ministeerie doet voor de taelen van Frankryk. Taelekunstenaers, direkteurs en diensters van Officen en associaesjen hen oek mei-eklapt.

Me hen ton den dag volend mit een bezoek in ‘t oud Rysel en me hen nuu een heëlen program te oprechten voor nuuze federaesje om den staet van nuuze streeketaelen te verbeeteren en voorts te doen.

Me bedanken alle de meidoenders, alle de meihelpers en de kollektiviteiten dien nuus holpen hen.